علي صوتك

كتير بتبقى عايز تتكلم
كتير اوي بيبقى جواك ...بس غالبا محدش فاهم كلامك غيرك
ممكن لو حبيت تعبر عن اللي جواك او تقول رأيك متعرفش توصله
تبقى مؤمن بكل كلمه جواك بتبقى عارف انت عايز ايه و نفسك في ايه
بس لما تيجي تعبر تفشل و اللي يسمعك يقلل من رأيك او يستهين بيه
لدرجة انك توصل لمرحله تحس ان سكوتك احسن و تخلي الحقيقه جواك
تحس انك لو اتكلمت مش هتفرق مع حد الا معاك لانك هتئذي مشاعر نفسك بس انك حبيت تخرجها و تقول كلمتك بس معرفتش
او مقدرتش
او حسيت انها مش هتخليك تاخد النتيجه اللي عايزها
كتير بتبقى نفسك كلمتك تعبر عنك و عن نفسك و اللي جواك و اللي نفسك تقوله
بس الكلمه ديه متطلعش في وقتها
متعرفش تقولها الا و انت لوحدك بتفكر تقولها في دماغك
و تفضل تفكر بعدها انا ليه مقولتش كده
كنت هقدر اوصل اللي نفسي فيه
بس للاسف ممكن ربكتك تنسيك
او انك تبقى واقف قدام شخص معين قدامه متعرفش تقول حاجه لكن قدام اي حد تاني تبقى كئنك جاي من قناة الجزيرة متوقفش الكلام
كتير بتحس انك ملكش لازمه ايه معنى كلامك مدام محدش هيسمعك و لو سمعك هيستقل بيك او بمشاعرك او برأيك
مع ان ممكن كلمة تقولها تغير مجرى حياتك بس المشكله في انك مش جرئ
المشكله في انك بتفكر قبل الكلمه ما تقولها مليون مره بس ده صح اه لكن بتحس انك هتتعب لو الكلمه ديه جابت نتيجه مش ترضيك

بس تفضل تفكر مع نفسك و نفسك بس اللي فهماك و حاسه بيك و عارفه انت عايز تقول ايه

حتى عشان تشتكي و تقول اللي تاعبك تلاقي نفسك مش عارف

و محدش هيحس بيك غيرك

حوار مع الدنيا

سألت الدنيا فين الحب الصافي؟ قالتلي متسأليش

سألتها ليش اللي باعنا نبيعه و منشتريش؟

ليه يا الدنيا تقطعي الوصال و متربطيش؟

ليه الحلو يخلص و الوحش مينتهيش؟

ليه القريب يبعد و البعيد ميمشيش؟

ليه لما احس يقولولي......متحسيش

و ليه بعد اللي شفته يا قلبي تسبني و مترجعليش؟

قالتلي الدنيا اللي بتسألي عنه ضاع متدوريش

زمنه خلص لو سألتي عنه متلاقيش

لا

كذابة يا دنيا القلب الصافي موجود و هيعيش

قلب لو جرحته يسامح و يطبطب ع اللي جرحه و يقوله انسى و عيش

مهما جرحتني هفضل اسامح و اقولك سيبك دنيا متستاهلش ولا تترضيش

قلب لو قلتله عايزك في خدمه يقولك كلي ليك ..مش يسيبني ميعبرنيش

قلب لو قلتله رأيك في الحب يقولك الحب عايش مبينتهيش

لو خلص الحب تخلص الدنيا و يخلص زمن البنيآدمين و متلقانيش

قلب ابيض طاهر يحس بيك لو سكت و مبينتش ..يقولك متخبيش

قلب فرحان بسام مع انه شايل احمال لو ترميها بحر متكفيش

قلب معاه متحسش بهم ولا يشيلك همه و لا يسمعك كلام ميترضيش

قلب اللي جواه على لسانه بس يقوله بجمال يحببك تسمعه و متمشيش

قلب لو اتظلمت يواسيك و لو ظلمت يهزك عشان تفوق تقول يا دنيا متتماديش

قلب راضي مبيتكلمش شايل ميبينش ولا يشتكيش

دوري انتي يا دنيا هتلاقيه موجود انتي اللي عاميه مبتشوفيش

انتي اللي عايزة تضيعينا و ترمي الغلط علينا و متقوليش

انتي اللي بتبعدينا و بتلاغينا و في بعض تكرهينا متتلاءميش

انا سيبتك يا دنيا للي زيك ابعدي عني متشدينيش


حفيدة الصحابة

يا رب الليلة

ياااااااااااااااااه اوام كده رمضان جري

الليله ديه اول ليله في العشرة الاواخر



فيهم ليلة القدر



خير من الف شهر



تنزل الملائكة و الروح فيها باذن ربهم من كل امر



سلام هي حتى مطلع الفجر



سلام هي حتى مطلع الفجر



سبحان الله ربنا بيجعلنا فرص كتير على مدار السنه عشان يطهرنا من ذنوبنا



رمضان اوله رحمه و اوسطه مغفرة و اخره عتق من النار



يوم عرفه



النصف من شعبان



ربنا رحييييييييييم بينا اوي و عايزنا نرجعله



يا رب تقبلنا



يا رب اعتقنا الليله



يا رب اعتقني يا رب اعتقني يا رب اعتقني من النار



يا رب نولني ليلة القدر



يا رب نولنا ليلة القدر



يا رب نفوز بيها و بكل رمضان



آمين آمين آمين

أول اربع ايام عدوا

ياااااااااااه الايام بتعدي هوا بجد

مش مصدقه ان اربع ايام من رمضان عدوا بالسرعه ديه

سبحان الله

بس تعرفوا فرحانه اوي اني شغاله طول الوقت

و بقعد ع النت بليل بس تقريبا يعني ممكن ادخل تخاطيف الصبح

نفسي اعمل اكتر ربنا الموفق يا رب

نفسي بس يبقى فيه افطار ايتام في الكليه زي بتاع السنه اللي فاتت

ياااااااااااااااااااه نفسي بجد هبقى فرحانه اوي هيبقى من احلى ايام حياتي باذن الله

و فرحانه اوي كمان بالحمله اللي عاملها طائر الليل الحزين

حملة شباب النهارده

و انها بدأت بجد و بداية جامدة يا رب تتحقق

و نفسي اوي اشاركهم مش بفلوس بس لكن اروح انظم معاهم

فرحانه اوي كمان اني سمعت صوت صحابي انهارده وحشوني اووووووووووووي

و فرحانه ان امي راضيه اوي يا رب علطول

اهو اجازة بقى و مريحاها فمبسوطه اوي

يا رب مخرجش من رمضان الا و انا مغفور لي

و معتوقه من النار

احنا لسه في اول عشره اهه اوله رحمه

ربي ارحمنا يا رب

بيعدي بسرعه اوي نفسي ميخلصش

يا رب اجعل كل ايامنا رمضان

يا رب اغفر لنا و ارحمنا و اعتق رقابنا

يا رب ارحم موتانا و موتى المسلمين

ربنا ادم محبتنا فيك

ربنا اعنا على صلة ارحامنا

يا رب تقبل مني

يا رب ميكنش حد زعلان مني و كله مسامحني على اي حاجه

يا رب ميكنش فيه ذنب عملته اذى حد من عبادك باي طريقه

و لو فيه يا رب يكون سامحني

عشان محدش ياخد من حسناتي يوم القيامه

و اغفر لكل المؤمنين و المؤمنات المسلمين و المسلمات الاحياء منهم و الاموات

اللهم صلي و سلم و بارك على سيدنا محمد و على آله و صحبه اجمعين

و آخر دعوانا ان الحمد لله رب العالمين

أشهد أن لا اله الا الله و أشهد أن سيدنا محمد رسول الله