السبت، 3 أكتوبر 2009

رجعنا الكلية و في ظل الأحداث..حاسه ان احنا في مشكلة

بسم الله الرحمن الرحيم


و انهارده السبت و رجعت الكلية

السنه ديه بقى البكالوريوس سنه رابعه علاج طبيعي

بس على نصيبنا و مع احداث الفلونزا الخنازير

الفصل الدراسي بتاعنا و اللي بنسميه روند و انا في اطفال دلوقتي

بقى صغير اوي

لسه دلوقتي داخلين يوم 3/10....و همتحن يوم 31/10 امتحان نص الترم

مع ان الترم مفاتش حتى ربعه

و همتحن يوم 12/11 امتحانات عملي

و همتحن يوم 13 او 14 /12 مش فاكره امتحانات نهاية الروند

و طبعا الامتحانات بتاخد وقت طويل

يعني بمعنى اصح انا رايحه الكلية الروند ده عشان امتحن مش ادرس ههههههههه


ده بقى شكلنا لما نتخرج ههههههههه



طيب فين المشكلة


بجد كنت بتكلم مع صحابي انهارده قلنا طيب لما احنا بيحصلنا كده

و طلبة المدارس بقوا ياخدوا ثلاث ايام في الاسبوع بس دراسه و كمان الحصة بقت نص ساعة بس

و ده غير طلبة الانتساب مبقاش ليهم كلية اصلا خالص غير يوم الجمعة بس

و غير الناس اللي قعدوا ولادهم في البيوت و مسابوهومش يروحوا المدارس عشان خايفين عليهم

و غير الدراسة اللي ممكن تتأجل خالص لو حصل و ظهرت حالات


طيب بردو فين المشكلة


مش ملاحظين ان الاجيال اللي جاية اصلا يعني اجيال دماغها فاضيه الى حد ما


التعليم بالنسبالهم مش حاجه اساسية في حياتهم


مش بيحبوا الدراسه او القراءة و الاطلاع زي الاول


معظم همهم النت و الدش و الخروج


و زياده عليها ان التعليم كان اصلا نظامه مش حلو


و بقى دلوقتي اسوأ و اسوأ


فالاجيال اللي جاية صعب ان يطلع منها علماء


و لو طلع هيبقوا قليلين


و هيبدأ العالم او المسلمين خاصة يفتقروا للعلماء مره ورا مره ورا زمن ورا جيل


لحد ما ميبقاش عندنا علماء


و نبقى بجد ماشيين بدماغنا و من غير ظابط او رابط و من غير ما نحكم امورنا صح


و ينتشر الجهل و اللا مبالاة


يا ترى ده فعلا من علامات يوم القيامة


ان يختفي العلماء


بجد في قلق جامد بجد احنا في ابتلاء


و ربنا يستر معانا و مع اولادنا في المستقبل


رأيكوا انتوا ايه



هناك 9 تعليقات:

The illusionist يقول...

اوااااااااااااااااال

The illusionist يقول...

اه وربنا ده انا الاول

قشطه
هييييييييييييييييييييييييييييييييه

بكالوريوس
مبارك يا حاجه
ربنا معاكى
انا لسه تانيه هندسه
مشوارى تويييييييييييييل

The illusionist يقول...

بصى علماء دى تشيليها خالص من دماغك
الاجيال اللى جايه فعلا
نصها فاشل او تلت تربعها
اهتمامتهم بقت غريبه جدا
مش اهتمامات علماء ابدا
اهتمامات ناس تفاهه
مظنش ابدا ان الجيل ده هيفلح
طول ما الاعلام والتعليم المصرى كده

The illusionist يقول...

وبس كده
البيان
انتهى

MOHAMMED ELBANNA يقول...

حفيدة الصحابة
وفقك الله في الدراسة وجعلك من المتفوقين
ولا تخافي من اختفاء العلماء فلربما اختفوا من مصر ولكن الوطن العربي مليء بهم وهم ينتظرون الفرصة .
ولا تنسي ان الخير في مصر ومصر دائماً ولادة للعظماء .
تقبلي مروري
محمد البنا
طريق النجاح

Yusuf يقول...

السلام عليكم

دي اول زيارة هنا

الدراسة بدأت وكل عام وانتم بخير

انا كمان ف البكالوريوس بس انا هندسة

النظام عندنا اتغير سنة اولي وتانية بيحضروا بعد العصر

واحنا وتالتة محاضراتنا الصبح

بجد صعبانين عليا هيحضروا ف عز الحر وهيروحوا بيوتهم بليل

بس هنعمل ايه ف العشوائية ف اتخاذ اي قرار بيحصل ف البلد

وبالنسبة للمشكلة اللي انتي طرحتيها

فكرة اختفاء العلماء ده تطور طبيعي للي بيحصل وللأسف الموضوع مش هيقتصر علي العلماء بس كمان مش هيبقا في مثقفين ومش هيبقا في ثقافة أصلا

ده كله طبعا الا اذا تفكير الناس اتغير
واتجهوا للي هيفيدهم بدل تضييع الوقت في الكلام الفاضي

عرض رائع

تحياتي

غير معرف يقول...

انا كمان رجعت الكليه وكل يوم بيقولوا انهم هيقفلوها

ربنا يستر دى اخر سنه عاوزين نخلص بقى

مممكن تشبى من التعليقات تاكيد الكلمه

شكرا ليكى

حنين

حسن حنفى يقول...

اعتقد ان العلماء مش هيختفوا من اي جيل هم ممكن اه يقلوا بشكل ملحوظ بس ده مش غلطهم ده بسبب الظروف اللي حوليهم

:)

The illusionist يقول...

انتى فين