الاثنين، 24 نوفمبر 2008

حوار مع الدنيا

سألت الدنيا فين الحب الصافي؟ قالتلي متسأليش

سألتها ليش اللي باعنا نبيعه و منشتريش؟

ليه يا الدنيا تقطعي الوصال و متربطيش؟

ليه الحلو يخلص و الوحش مينتهيش؟

ليه القريب يبعد و البعيد ميمشيش؟

ليه لما احس يقولولي......متحسيش

و ليه بعد اللي شفته يا قلبي تسبني و مترجعليش؟

قالتلي الدنيا اللي بتسألي عنه ضاع متدوريش

زمنه خلص لو سألتي عنه متلاقيش

لا

كذابة يا دنيا القلب الصافي موجود و هيعيش

قلب لو جرحته يسامح و يطبطب ع اللي جرحه و يقوله انسى و عيش

مهما جرحتني هفضل اسامح و اقولك سيبك دنيا متستاهلش ولا تترضيش

قلب لو قلتله عايزك في خدمه يقولك كلي ليك ..مش يسيبني ميعبرنيش

قلب لو قلتله رأيك في الحب يقولك الحب عايش مبينتهيش

لو خلص الحب تخلص الدنيا و يخلص زمن البنيآدمين و متلقانيش

قلب ابيض طاهر يحس بيك لو سكت و مبينتش ..يقولك متخبيش

قلب فرحان بسام مع انه شايل احمال لو ترميها بحر متكفيش

قلب معاه متحسش بهم ولا يشيلك همه و لا يسمعك كلام ميترضيش

قلب اللي جواه على لسانه بس يقوله بجمال يحببك تسمعه و متمشيش

قلب لو اتظلمت يواسيك و لو ظلمت يهزك عشان تفوق تقول يا دنيا متتماديش

قلب راضي مبيتكلمش شايل ميبينش ولا يشتكيش

دوري انتي يا دنيا هتلاقيه موجود انتي اللي عاميه مبتشوفيش

انتي اللي عايزة تضيعينا و ترمي الغلط علينا و متقوليش

انتي اللي بتبعدينا و بتلاغينا و في بعض تكرهينا متتلاءميش

انا سيبتك يا دنيا للي زيك ابعدي عني متشدينيش


حفيدة الصحابة

السبت، 20 سبتمبر 2008

يا رب الليلة


ياااااااااااااااااه اوام كده رمضان جري



الليله ديه اول ليله في العشرة الاواخر



فيهم ليلة القدر



خير من الف شهر



تنزل الملائكة و الروح فيها باذن ربهم من كل امر



سلام هي حتى مطلع الفجر



سلام هي حتى مطلع الفجر



سبحان الله ربنا بيجعلنا فرص كتير على مدار السنه عشان يطهرنا من ذنوبنا



رمضان اوله رحمه و اوسطه مغفرة و اخره عتق من النار



يوم عرفه



النصف من شعبان



ربنا رحييييييييييم بينا اوي و عايزنا نرجعله



يا رب تقبلنا



يا رب اعتقنا الليله



يا رب اعتقني يا رب اعتقني يا رب اعتقني من النار



يا رب نولني ليلة القدر



يا رب نولنا ليلة القدر



يا رب نفوز بيها و بكل رمضان



آمين آمين آمين

الأربعاء، 3 سبتمبر 2008

أول اربع ايام عدوا

ياااااااااااه الايام بتعدي هوا بجد
مش مصدقه ان اربع ايام من رمضان عدوا بالسرعه ديه
سبحان الله
بس تعرفوا فرحانه اوي اني شغاله طول الوقت
و بقعد ع النت بليل بس تقريبا يعني ممكن ادخل تخاطيف الصبح
نفسي اعمل اكتر ربنا الموفق يا رب
نفسي بس يبقى فيه افطار ايتام في الكليه زي بتاع السنه اللي فاتت
ياااااااااااااااااااه نفسي بجد هبقى فرحانه اوي هيبقى من احلى ايام حياتي باذن الله
و فرحانه اوي كمان بالحمله اللي عاملها طائر الليل الحزين
حملة شباب النهارده
و انها بدأت بجد و بداية جامدة يا رب تتحقق
و نفسي اوي اشاركهم مش بفلوس بس لكن اروح انظم معاهم
فرحانه اوي كمان اني سمعت صوت صحابي انهارده وحشوني اووووووووووووي
و فرحانه ان امي راضيه اوي يا رب علطول
اهو اجازة بقى و مريحاها فمبسوطه اوي
يا رب مخرجش من رمضان الا و انا مغفور لي
و معتوقه من النار
احنا لسه في اول عشره اهه اوله رحمه
ربي ارحمنا يا رب
بيعدي بسرعه اوي نفسي ميخلصش
يا رب اجعل كل ايامنا رمضان
يا رب اغفر لنا و ارحمنا و اعتق رقابنا
يا رب ارحم موتانا و موتى المسلمين
ربنا ادم محبتنا فيك
ربنا اعنا على صلة ارحامنا
يا رب تقبل مني
يا رب ميكنش حد زعلان مني و كله مسامحني على اي حاجه
يا رب ميكنش فيه ذنب عملته اذى حد من عبادك باي طريقه
و لو فيه يا رب يكون سامحني
عشان محدش ياخد من حسناتي يوم القيامه
و اغفر لكل المؤمنين و المؤمنات المسلمين و المسلمات الاحياء منهم و الاموات
اللهم صلي و سلم و بارك على سيدنا محمد و على آله و صحبه اجمعين
و آخر دعوانا ان الحمد لله رب العالمين
أشهد أن لا اله الا الله و أشهد أن سيدنا محمد رسول الله

الأربعاء، 27 أغسطس 2008

قرب خلاص


باقي من الزمن ثلاث ايام
يااااااااااااااااااه يا ترى هفوز بيه
انا بحبه اوي و نفسي مضيعوش

حبيبي رمضان

افضل رمضان مر عليه في حياتي كان رمضان السنه اللي فاتت و بجد
خرجت منه فرحانه اوي
و بطلب من ربنا يبقى الشهر السنه ديه افضل و افضل
شهر بيفوقنا لحاجات كتير
و بندوق فيه لذة اتحدى ان حد يدوقها في اي شهر تاني
وحشني اوي اني احس براحه
بس علطول خوف الواحد انه يكون بيغضب ربنا قالقه
بس بيرتاح اوي لما يقرب في رمضان و بيحس انه فعلا كان بعيد
و بيحاول يستمر على نفس اللي كان عليه في رمضان
الدنيا ديه وحشه لما بتبعدنا عن ربنا
و احنا اوحش لما بنستسلم ليها
ربنا ميجعلش الدنيا مبلغ همنا

بحبك يا رب و يا رب مضيعوش

يا رب مضيعوش
يا ترى انتو كمان وحشكو رمضان
بس اكيد ميكفيش الوحشه
لازم منضيعش ثوابه باذن الله
لعله آخر رمضان في حياتنا
زي ما كان رمضان الماضي آخر رمضان في حياة ناس عرفناهم
ربنا يهدينا جميعا يا رب لما يحبه و يرضاه في الدنيا و الآخره
ربنا رحييييييييم اوي انه خلالنا فرصه زي رمضان
و العشر الاواخر
و ليلة القدر
ربنا بيحبنا اوي و عايزنا نرجعله و هو اللي فضل رحمته على عذابه
و هو الارحم بنا من امهاتنا
و هو القائل
قل يا عبادي الذين اسرفوا على انفسهم لا تقنطوا من رحمة الله ان الله يغفر الذنوب جميعا
و هو القائل
فاذا سألك عبادي عني فاني قريب اجيب دعوة الداعي اذا دعاني
بنطمع ديما في كرمك يا رب و انت الكرييييييييييييم
و في رحمتك و انت الرحييييييييييييييييييييييييييييم
و في صبرك علينا و انت الصبوووووووووووور

اللهم بلغنا رمضان
رمضان كريم و الله أكرم

الخميس، 31 يوليو 2008

في ناس دورت عليه...هي ديه قمة الايمان


الحمد لله على نعمة الاسلام

الحمد لله اننا اتولدنا مسلمين

بجد ربنا رحمنا من امتحان صعب اتحط فيه ناس كتييييييير

قصه قوية اوي روتها سيدة اعتنقت الاسلام

رجعتني لقصة سيدنا ابراهيم عليه السلام

قالت قصتي بدأت بصغري بعد موت أمي

قالت

كنت صغيره اوي و لما امي ماتت

زعلت اوي من ربنا انه أخد أمي

بس ساعتها فقت لحاجه مهمه اوي بالرغم من صغر سني

انا اه زعلت من ربنا بس عرفت ان في ربنا و انه بايده كل شئ

نقطة سلبيه جابتني لنقطة غيرت مجرى حياتي

لازم ادور على دين

و نضجت قبل سني و كنت مش بلعب في المدرسه مع البنات اللي من سني

و كنت بقعد لوحدي و بفكر

و كانوا البنات بيرغبوني في المسيحيه بس

مقدرتش اقتنع بيها ابدا

قالولي المسيح ابن الله و حاولوا يقنعوني و يرغبوني بالهدايا بس مكنتش مقتنعه

و بدأت أقرأ في الهندوسيه و البوذيه

بس محستش انها الحق و ان ده الطريق السليم

فضلت كده لحد سن 23 سنه

و انا بقرأ في كل دين و بدور على الدين الحق

و مكنتش سمعت عن الاسلام في مدينتي لانها كانت صغيره و مش منفتحه اوي

بس سافرت و بدأت ادور و رحت الهند و رحت الصين

شفت في الصين مسلمين صينيين

بالرغم من انهم مكنوش يعرفوا دينهم اوي لسه

بس حسيت ان فيهم اختلاف كبير في تعاملهم و شخصيتهم و اسلوبهم عن باقي الصينيين

كنت قاعده مره و سمعت صوت جميل بيقرأ كلام جميل

حسيته اوي و حسيت ان ده اللي كنت بدور عليه

حسيت ان الكلام ده سمعته قبل كده و حسيت انه مش غريب عليه

دلوقتي حاسه انا سمعته فين قبل كده

سمعته و انا في بطن أمي

هو ده الدين الحق و هو ده اللي كنت بدور عليه

و اعتنقت الاسلام و مكنتش اعرف حاجه لسه عن صلاة و حجاب

بس اطمئنيت ليه و اطمئنيت للكلام اللي سمعت المقرئ بيقوله

ده القرآن الكريم

و بعدها امرأه مسلمه اتعرفت عليها بدئت تعلمني الصلاة و الحجاب

و فعلا تفقهت في الدين و بدي محاضرت دلوقتي


يااااااااااااااااااااااااااااااااااااااااااااااااااه شفتوا

فضلت تدور على دينها قد ايه

احنا اتولدنا مسلمين و اتعلمنا دينا من صغرنا

بس السيده ديه دورت عليه و حسته و آمنت بيه

لا اله الا الله

ده قمة الايمان

قمة الاعتراف بوحدانية الله

أشهد ان لا اله الا الله و اشهد ان سيدنا محمد عبده و رسوله

و الجنة حق

و النار حق

و الملائكة حق

و كتبه حق

و آمنت بالقضاء و القدر حلوه و مره و خيره و شره

و باليوم الآخر

الأحد، 20 يوليو 2008

مش لاقيه عنوان

في الاول بس مش معنى موضوعي اني كده علطول
انا انسانه عاديه جدا و بضحك و بلعب و بعبد ربنا الحمد لله
بس اكيد كل انسان لازم بيحزن في وقت
اكيد ده حال الدنيا
مش لاقيه عنوان بجد
الاول أنا مش هطول
بس أنا مبقتش عارفه نفسي
أنا فعلا تايهه ولا مالي
أبدأ احكي عن ايه ولا ايه
مثلا
اللي أعرفه اني عمري ما فكرت اني مهتمش بصحابي
بس فجأه كل حاجه في دماغي اتلخبطت
مش عارفه اراجع نفسي ولا أعيد حساباتي
أنا بحبهم و بخاف عليهم و على زعلهم
ده متأكده منه مليون في الميه
بس أنا مش عارفه تايهه ليه
أو يمكن عارفه بس مش عايزه أفاتح نفسي في الموضوع
طيب نقول مع صحابي هما عذروني و بالعكس
بيقولولي احنا مش عايزين غير اننا نتصل نطمن عليكي
و انا اتحايل على صحبتي في التليفون .هذأيني اعملي فيه اي حاجه
بس انا غلطانه بالله عليكي ما تزعلي اني طولت من غير ما أسأل
و هي تقوللي ولا يهمك انا هكلمك
و مش هي و بس
بجد اكتر اللي بيحصل معاهم كده صحاب المدرسه
مش عارفه ايه التار اللي بيني و بين التليفون
ليه مبحبش اتكلم فيه
طيب بلاش نسيب الموضوع ده
موضوع تاني
في الدراسه انا كنت بذاكر آه
بقعد تلت ساعات على الكتاب اوك
بس كنت بركز قد ايه فيهم؟؟؟؟؟؟؟
أقدر اقول اني كنت بركز بالظبط نص الوقت ان مكنش أقل
كنت بفضل بقية الوقت في عالم تاني
مش في الدنيا أصلا
الحمد لله على الصلاة بجد نعمة
الحاجه الوحيدة اللي بتخليني افوق و ارجع
طيب اعمل ايه في نفسي
بجد حاولت كتير مع نفسي و فعلا فقت و بقيت كويسه جدا
بس شوية و ارجع تاني
و ارجع اقول عارفه السبب و مش هتغير من غير ما اعالج السبب الاول
لازم اعالجه
بس ازاي
لازم ابدأ بنفسي صح؟
اكيد و ده اللي بعمله
بس بقف عند النقطة ديه و مبتعداش للي بعد كده
و بالتالي برجع زي ما كنت
و أنا مش عارفه اتغير
يا رب انت بس اللي بايدك تساعدني

أنا بحبك اوي و نفسي تبقى راضي عني

ان لم يكن بك علي غضب فلا ابالي

بس هو ثقة أكتر

و سعي و توكل

و هتتحل

صح؟

باذن الله

الخميس، 17 يوليو 2008

رحلة الى المريخ


كنت في الأرض انسان عادي ميفرقش معايا نهار ولا ليل

و كنت بحاول اعيش في الدنيا كده علطول من غير مواويل

من كتر الظلم اتعلمت ازاي من الكره اشيل احمال

والله ما بهزر .. دنيا تهدم من الحب جبال

و بقيت للظلم من الاسياد و بقيت في عالم من الاموات

ضمير مش عايش من غير ما يملا الارض جراح و آهات

فجأه لقيت مركبة بتطير قالتلي جايه من المريخ

خدتني غصب عني لعالم ما اعرفله تاريخ

عالم غريب اوي عليه اتمليت منه خوف

قولتلهم للدنيا رجعوني خايف اعملوا معروف

قالولي استنى شوية مالك ع الرجوع ملهوف

مش تستنى ندوقك من اللي دوقت منه الوف

ظلمت كدبت سرقت نهبت نصبت خليت للحاجه ممدوده كفوف

ليه تعمل الغلط يا ابن آدم و منتهاك عندنا معروف

قالهم تبت و ندمت رجعوني هصلح احوالي

و عمر ما حاجه غلط تاني في يوم تيجي في بالي

قالوله هنجربك يا ابن آدم و نشوف

عند قولك ولا للي كنت عليه هترجع من غير كسوف

و رجعوه و يا ريتهم ما رجعوه

كأنه كان في حلم ليه مألوف

لا أثر فيه ولا رجعه عن الظلم و الفساد

و رجع تاني يئذي في العباد

رجعوله و قالوله بقى ده كان اتفاقنا

يااااااااااااه عليك يا ابن آدم من الفتنه

الدنيا بتاخدك حتى من انك تفتكر

ان رب العباد في الكتاب ذكر

لو رجعناك للارض بعد ما الموت حضر

كنت هتقول رب ارجعوووووووووووون

و كنت هترجع بردو...... بقلب حجر

لا يا ابن آدم الحق نفسك

مفيش عوده من الآخرة تتحسبلك

عملك في الدنيا ده اللي واقفلك

بيقولك تعالى يا عليك....... يا هقف جنبك
(حفيدة الصحابة)

الثلاثاء، 15 يوليو 2008

ويلي من الغربه يابا ويلي..........


مشينا كتير.......تعبنا كتير.......مشينا لوحدينا تعبنا
الغربة
كلمة صعبه أووووووووي على أي حد
خصوصا لما تفارق ناس عزيزة عليك حبيتها و اتعلقت بيها
لما تقابل حد و تحبه في الله و تحس انه بقى جزء منك
و بعدها فجأه يبعد عنك
حاجه ممكن تباعد المسافات
الغربة صعبه فعلا
بس مننساش
احبب من شئت فانك مفارقه
يعني الفراق مكتوب علينا كلنا
و مننساش انه اختبار ........يعني نحاول ننجح فيه و نفوز برضى ربنا
بس الغربه ممكن تكون و المسافات قريبه
لما يقل السؤال
و يقل الاهتمام
و يقل الاتصال
بيبقى اصعب انواع الغربة
لما تبقوا قريبين لكن متوصلوش لبعض
لكن الاصعب
لو فقدت شخص عزيز للابد
حبيبي أخويه الصغير
من اقرب الأشياء اللي فقدتها و عمري ما هنساها
و احتسبته أنا و أهلي عند ربنا
اتوفى صغير 8 سنين طاهر من الذنوب
ربنا يجمعنا بيه في الفردوس
الغربه صعبه مووووووووووووووت
بس تحس بطاقه ايمانيه عالية
لما تحتسب و تصبر
ان الله مع الصابرين

الأحد، 13 يوليو 2008

أنا عايش....و مش عايش



انا عايش و مش عايش..........أنا مش هغني

أنا بس بفكر ازاي أكون عايش بس...........مش عايش

قبل اي حاجه لازم احط الاساس

الا بذكر الله تطمئن القلوب

لو مش مطمن و قلقان و حزين

حاسس انك مش لاقي نفسك

مش عارف انت عايش ولا ..........

قوم اتوضى و صلي ركعتين و ناجي ربنا

بأسهل لغه ممكن تستخدمها

لانه اقرب اليك من حبل الوريد.........عارف اللي فيك و عارف المك و حزنك ........و هو ارحم بيك من أي حد

طيب مش ممكن نسأل ايه ممكن يكون سبب بعدك ده او حزنك و قلقك

يمكن تكون مش محدد هدفك..........يعني مش عارف انت عايش بتعمل ايه ........او عايش عشان توصل لايه

هدفك و نيتك ابدأ بيها قبل اي عمل

جدول حياتك و خليك صاحي لكل حدث حواليك...نصيحه جامدة و ليه قبل ما تكون ليكو

نيه خالصه و ثقه بالله و علطول افتح ع الرابع و سيبك من اي حد ممكن يهدمك او يأخرك

بس حاول دايما تخلي جنبك شخص يبقى سند ليك

مش هتقدر تعيش لوحدك

مش هتقدر تكمل

حب اللي حواليك و خلي مساعدتهم نقطه مهمه في حياتك

متزعلش من حد و بادر بالمسامحه

اعمل اصحاب و اخوات و اهل

مفيش حاجه مهما كان جمالها

تقدر تكمل فيها الا و في انسان بتحبه جنبك و معاك

كده كل حاجه يبقى ليها طعم تاني

و تبقى ساعتها

عايش عايش

السلام عليكم..أول مرة

السلام عليكم و رحمة الله و بركاته

ياااااااااااااااه أول مره

أول مرة اندمج كده في عالم النت

أول مرة امبارح اعرف اعمل شات

أول مرة انهارده أنشئ مدونه

أول مره اعرف يعني ايه مدونة من مدة مكملتش شهر

أول مره اعرف اتعامل حلو مع النت كان من سنه بالضبط

يا ترى العالم ده هيوديني لفين

يا ترى مين الناس الجديده اللي هعرفها

يا ترى ايه هيشدني من آراؤهم

و ايه هعارض و ايه هوافق عليه

يا ترى الطريق معايا هيبقى صح علطول ولا يمكن اغلط

و اكيد هغلط

بس الأهم من كل ده

النيه

نويت أي حاجه ليك يا رب

فوفقني لما تحب و ترضى

و يا رب أفيد على قد ما أقدر