السلام عليكم و رحمة الله و بركاته
الموضوع ده هكتبه بلغتي العاميه
عشان اعرف اعبر فيه عن كل اللي جوايا
حبيب قلبي محمد اخوية الصغير
وحشتني اووووووووووووووووووووووووووووووووووووي
عمري ما نسيتك فكراك علطول
انا مش زعلانه لموتك بس زعلانه عشان انت وحشتني اوي
بس اليومين دول انت في عقلي جامد
فاكرة انك كنت زي ظلي
كنا مع بعض علطول
كنت كل ما انزل العب مع صحابي تلزق فيه و انا اقول يوووووووه انا عايزة انزل لوحدي بقى
بس كنت بخاف اوي تنزل من ورا ماما فتتوه فكنت باخدك معايا
و كنت افضل ابص شمال و يمين و انا خايفه لحسن تختفي في لحظه عن نظري و مشوفكش تاني
و لو لحظه معرفتش الاقيك كنت ببقى مجنونه و اصرخ في صحابي محمد اخويه فين مش لاقيه اخويه
بس كانوا يضحكوا عليه عشان بتبقى قدامي بس من كتر خضتي مش شيفاك
معلش متزعلش مني انا كنت بزعقلك كتير اوي بس والله عشان كنت خايفه عليك و بحبك و كنت مش عايزاك تعمل حاجه غلط
فاكره يوم ما توهت اني فضلت اجري ادور عليك لحد ما لقيتك بتاندي جامد يا اسمااااااء يا احمد يا عمرو انتو فيييييييين و كنت بتعيط و متعور في ركبتك الاتنين
فجريت عليك و حضنتك جامد و مش سبتك الا في ايد ماما
فاكره اني كنت مش بطمن الا و انت معايا
حتى كنت بخاف عليك و انت مع ماما لاني كنت عارفه ان محدش بيخاف عليك بجنون زيي فكنت براقبك في كل مكان
فاكر الاستعراضات اللي كنا بنعملها مع بعض على اغاني الكرتون
فاكر لما كنت بذاكرلك
فاكر لما كان حد من صحابي بس يضايقك كنت بضربه بطريقه جنونيه من غير ما احس مكنتش بطيق حد يجي جنبك او يزعلك او يخليك تعيط
و لما كنت بتطلع رحله مع المدرسه كنت بفضل خايفه و مخضوضه لحد ما ترجع
فاكر يا محمد
يوم الجمعه
لما قلت لماما انا عايز اكل كشري
و انا كنت لسه مخلصه مذاكره
قلتلها هنزل مع محمد يا ماما ناكل كشري في المحل
و نزلنا و كلنا
و احنا راجعين لقيت صحابك بيلعبوا قدام العمارة قلتلي انا هقعد العب معاهم
فضلت ازعقلك عشان تطلع معايا مرضتش
فطلعت قلت لماما فضلت تندهلك من البلكونه مرضتش تطلع و قلت احدفولي كورة السلة
مرضيناش خالص
بس لقيناك فجأه طالع و جريت بسرعه اخدت الكورة و نزلت و محدش عرف يوقفك
بعد شوية سمعنا صريخ العيال في الشارع
و اخوية الكبير دخل من البلكونه
الحقوا محمد خبطته عربيه
كلنا صرخنا محماااااااااااااااااااااااااااااااااااااد
و بصينا من البلكونه لقيناك على الارض و لقينا رجلك شكلها غريب اوي
كنت مش عارفه ايه ده بس افتكرنا العربيه داست على رجلك بس
جرينا كلنا و نزلنا من البيت على الشارع و اتلمينا حواليك و فضلنا نصرخ
محماااااااااااد لاااااااااااااا
و انا فضلت اخبط في عربيه قدامي جامد و هجت و فضلت اصرخ اوي
و بعد كده فجأه سكت و بصيت في عينيك و انت واقع على الارض على بطنك
و لقيت فجأه عينك كئنها بقى فيها حول
و انت مادد ايدك لفوق كئنك بتشاور لحد
انا فضلت بصالك لحد ما حطيت دماغك على الارض
و بعدها صمت رهيب و مفيش حركه
مكنتش اعرف انها نظرة الموت
انا حاسه دلوقتي بسخونيه و رعشه نفسها اللي حسيتها يوم وفاتك مكنتش اعرف اني لما اكتب هيرجع نفس الاحساس ده تاني
بابا لقيته جي بيجري و ركب العربيه
و الناس شالوك من الارض من ايدك و رجلك عشان يحطوك في العربيه
و فجأه و هما بيشيلوك
لقيت شلال دم نازل من بطنك مكنتش اعرف ان العربيه عملت فيك كده
مكنتش عربيه كانت مأطورة شايله بضاعه
ساعتها صرخت جاااااااااااااامد اكتر من الاول
بس فضلت بردو ادعي ربنا يا رب خلليلي محمد يا رب احلفك بسيدنا محمد تخليلي اخويه
و الجيران جم خدوني و يشربوني لمون و اخويه الكبير فضل يحضني اوي
و فضل يهديني و يدعي معايا
و خالتي جت اول ما قلنالها
و فضلنا كلنا مستنيييييييييييييييييييين
لحد ما بابا جه و معاه بوليس كتير و ظابط
جرينا كلنا على بابا
مقالش غير كلمة واحده
محمد مات
بعدها محستش بنفسي فضلت اصرخ جامد و انا بقول الحمد لله و حاضنه خالتي
و اخوية الكبير صرخ مره واحده قال لاااااا و بعدها دخل على اوضته
و انا فجأه سكت محستش بحد و اتخضوا افتكروا اني حصلي حاجه و فضلو يهزو فيه و يشربوني ميه و يقولولي صرخي متعمليش فينا كده صرخي
و بعدها كلنا سبنا البيت اللي حصلت فيه الحادثه
كان عندنا بيت تاني اللي احنا قاعدين فيه دلوقتي نقلنا عليه
اول ما شفت ماما جايه من المستشفى
محدش يتخيل امي كانت عامله ايه
مش محتاجه اوصف ام فقدت ابنها تبقى عامله ازاي
و خاصة لو في حادثه زي ديه
بس فاكره ان جلبيتها كانت كلها دم من اخويه
و فضلت تبوس فيها
بس انا تاني يوم فضلت ادور على الجلبيه ديه مش عارفه ليه بس كنت عايزة اشوف حاجه فيها حته من اخويه
انا بحبك اوي يا محمد بجد وحشتني
بس انت في الجنة انا عارفه انك فرحان اوي يا بختك باللي انت فيه
يا بختك يا حبيب قلبي
ربنا يوعدني بلقياك
فاكرة ان اول حم حلمته بيك بعد وفاتك
اني سألتك محمد انت شفت ربنا فهزيت راسك فوق و تحت بتقولي اه
و بعد كده لقيتك جايبلي بونبوني معاك
دقت واحده قلتلك حلوة اوي
فلقيتك حططلي كتير اوي على السرير
و قلتلي نفسك في ايه
قلتله سرير
فلقيت اربعه كده شايلين سرير و جابوه و قعدت انا و اخويه محمد عليه
وحشتني يا اخويه
مش هنساك ابدا يا محمد
بحبك
الصور مش باين منها غير خيالات
بس مبقاش في حاجه اقدر اصورك منها الا صور الالبوم اللي عندي
لو شايفينه ده و هو ماما ماسكاه من ايديه الاتنين
.jpg)
.jpg)
و ده و انت جنبي قبل ما نروح المدرسه كنت بتضحك اوي
.jpg)
و ده و احنا في مدينة الانتاج الاعلامي
.jpg)
سلااااااااااااااام يا محمد
هناك 16 تعليقًا:
حفيدة الصحابة ..
يا صاحبة أطيب قلب.. بجد مش عارفة أوصفلك احساسي بكلماتك خلتني أبكي بحرقة ووجع..
هزتني من جوة ما أقسى انياب الموت حين تنهش قلوبنا وتسرق منا أغلى الناس وأحلاهمفيتركون خلفهم فراغ قاتل مميت ..
محمد كان رائعا كالملاك فلا تبكيه عزيزتي اذكريه بكل الخير
حتى لو لم تكن الصور واضحة فهي بقلبك مطبوعة
ربنا يرحمه ويجعل الجنة مثواه
كوني بخير
كلمات بسيطه اوصف من اى شعر
ابكيتنى كثيرا بوصفك لحادث اخيكى صدقا
ولكن لا املك إلا ان اقول الهمك الله واهلك الصبر
وجعلها الله أخر احزانك
ربنا يصبركم يا اسماء
ويجمعكم بيه فى جنانه يارب
مش قادره أقولك ايه
ابكيتى قلبى حبيبتى
ربنا يعوضكم فيه خير
سبقكم الى الله الجنه
الموت أصعب شئ وخصوصا لم يكون حد بتحبيه اوووى
مش عارفه اقول ايه بجد
مش قادره أوصف احساسى
السلام عليكم
لا اخفيك سراً فلم استطع قراءة الموضوع
دون ان تسيل عبراتي...
رحمه الله وادخله فسيح جناته
السلام عليكم
كلماتك طرقت أبواب القلب فلم يحتمل قلبي وجعك واشتياقك لأخيك فأبت عيني إلا ان تشاركك حزنك فدمعت
أسأل الله أن يجمعكي وأخيكي وأهلك عند حوض النبي المصطفى في أعلى عليين ..
دمتي بخيــر..
لا تنسوا اخوانكم في غــزة من دعائكم
||..بحــر الدموع..||
ان شاء الله في الجنه
ربنا يكون في عونكم جميعا
الكلام صدقيني معبر اوي عن الحزن اللي انتي عايشاه اما بتفتكريه
بس اللي بيواسكي انه في الجنه
الله يرحمه ويسكنه فسيح جناته
بجد اتأثرت جدا بكلماتك
اختي حفيدة الصحابة ..
والله كلماتك واحساسك وصل لقلبي بشكل رهيب . ..
اسأل الله ان يجيرك في مصيبتك ويخلف لك خيرا منها ..
انا لله وانا اليه راجعون ..
حبيبتي في الله
بجد مش عارفه اقول ايه
بس احساسك عالي اووي ..انا عيني دمعت و انا بقرأ البوست
ربنا يصبرك يا حبيبتي و يجمعك بيه في الجنه و بكل احبابك
لن ازيد آلامك بكلمات تصف ما شعرت به
فقط سادعو لك..ان يجمعك الله به وجميع أهلك فى الفردوس الأعلى
البقاء لله
عزيزتى حفيدة الصحابة :
لقد أثرت فى تلك الكلمات التى سطرتيها عن أخيك رحمه الله رحمة واسعة وجمع بينك وبينه فى الجنة بإذنه تعالى على قدر ما تحبيه وتشعرين به من أسى لفراقه .
والله لقد دخلت مدونتك هذه للمرة الأولى وووجدت خطابك مع أخيكى وذكرياتك معه تشدنى إلى نهاية هذا الخطاب ولم أتمالك نفسى من هول الفاجعة التى أصابتك وأصابت باقى أسرتى ووجدت عينى تهطل بالدموع الساخنات على شيئين الشئ الأول هو فراقك لأخيك ومشاعرك تجاهه وعلاقتك به
والشئ الثانى هو أننى فرحت بأن فى هذا المجتمع ما زال هناك أشخاص يحملون من المشاعر النبيلة والإخلاص والحب ما يتمناه كل فرد.
لا أجد إلا أن أقول لكى بأن الله عز وجل قال " وبشر الصابرين الذين إذا أصابتهم مصيبة قالوا إنا لله وإنا إليه راجعون ، أولئك عليهم صلوات من ربهم ورحمة وأولئك هم المهتدون "
لقد نال أخيكى الشهادة وقدر الله له أن يلتقى به فلا تحزنى على لقاءه بربه
وثقى تماماً بأن الله سيجمع بينك وبينه فى جنته إن شاء الله
جزاكم الله خيرا جميعا على احساسكم و كلامكم احبتي في الله و آسفه اني برد متأخر ربنا يكرمكم جميعا
بجد سامحك الله
الوحد مش ناقص
ربنا يتقبله في الصالحين
ويلحقكم بيه في الفردوس الأعلى
تقبلوا مروري
إرحمي نفسك يا اختي .. كلامك ووصفك رهيب .. جدا جدا جدا
تدوينة مفعمة بالحزن والأسى .. !!
الصبر الصبر .. ورحمه الله !
عبد الرحمن
اللهم آمين اللهم استجب ...جزاك الله خيرا
Asi omar
جزاك الله خيرا
اللهم صبرنا في بلوانا
إرسال تعليق